تطوير لغتك شيء ضروري سواء كنت مقرر تختبر ايلتس أو لا .. مين مننا دحين اللغة مهي شيء مهم في حياته؟ إذا ما كنت تحتاجها عشان اختبار أو سفر أو وظيفة فأنت تحتاجها عشان تفهم العالم حولك حرفيا وتتطور ذاتك وقدراتك، وعشان تطور لغتك.. لازم تشتغل على مهاراتك في القراءة..  هي بالطبع عمود أساسي في عواميد تطوير اللغة .

اذا قررت تبدأ في القراءة عشان تطور لغتك راح تسمع من اللي حوالينك ترشيح لمصادر كثير زي:

• اقرأ جرائد
• اقرأ مقالات علمية
• ركز على اهم الأحداث
• اقرأ في السياسة

خليني اسألك.. هل تشوف هذي المصادر مناسبة لبدايتك في القراءة؟

مصادر تطوير القراءة مرة كثيرة.. منها الفعال ومنها اللي ما يوصلك لنتيجة ملموسة ولا تلمس تطور بنفسك حتى بعد شهور طويلة من استخدام هذه الطرق.. وخاصة هذي الطرق اللي ذكرتها فوق مرة مهي مناسبة كبداية،، لانه ببساطة عشان تطور لغتك لازم تستخدم مصدر مناسب ليك ومناسب لمستواك الحالي.. يعني مفهوم بنسبة ٥٠ الى ٧٠٪

ومستحيل وانت لسة مستواك مبتدئ تفهم هذي النسبة وانت تقرأ جريدة او مقال علمي.. واللي حيصير انه حتترجم كل المقال اللي قاعد تقرأ منه وبعد شوي تطفش وتسحب على كل الاموضوع لانه ما اخترت المصدر المناسب بواقعية..

هذا الكلام اقوله ليك عن تجربة.. ٣ سنوات وانا اجرب كل طريقة اسمع انها ممكن تطور لغتي ومن خلال تجربتي هذي قدرت اعرف ايش المصادر الغير فعالة وايش المصادر الفعالة في تطوير مستواك.. والجمدلله بفضل ربي بدأت في اختبار القراءة بالايلتس بدرجة ٣.٥ ودحين درجتي في هذا؛ القسم ٩ من ٩ وهي درجة جدا جدا متقدمة.

ايش افضل مصدر لتطوير القراءة؟

الإجابة هي: قراءة القصص والروايات هي الأفضل على الإطلاق! نعم.. قصص وروايات يعني مهي كتب معقدة من ألف صفحة ولا هي مناهج سويتها جامعة كذا أو مستوردة من دولة كذا.. باختصار القصص والروايات هي خطوتك الأولى والأقوى لتطوير مهارة القراءة عندك.

ليش القصص والروايات؟

لانه باختصار الروايات تعتمد بشكل أساسي على الخيال.. بمعنى وأنت تقرأ الأحداث اللي في الرواية تحاول تتخيل المشهد وتتكون صور ذهنية في مخك لهذاك المشهد.. استخدام الخيال بهذا الشكل يساعدك ما تنسى و بالتالي راح تفهم معنى الكلمات بالزبط بدون حفظ ونفس الشيء في هيكلة الجرامر وتراكيب الجمل.

📚 مصادر القراءة

لا تنسى انه مهم تختار شيء مناسب لمستواك.. ودحين راح اشاركك أفضل مصادر يمديك تستخدمها في القراءة يوميا واكيد راح تناسبك

📓مصدر اوفلاين:

روايات اكسفورد.. عبارة عن روايات وقصص من الأدب العالمي مكتوبة بلغة أكاديمية مبسطة مناسبة لأي شخص حاب يتعلم حسب مستواه.. والميزة الرهيبة في كتب اوكسفورد انها مقسمة مستويات من ١ إلى ٦،  تبدأ من المستوى المناسب ليك وتتدرج بالمستويات الين توصل للأعلى فالأعلى،  وكل ما يتقدم مستواك شوي كل ما راح تنتقل للمستوى اللي بعده بسهولة وسلاسة.

لكن.. كيف تعرف المستوى المناسب ليك؟ المستوى المناسب هو اللي تفهم منه بنسبة تقريبا ٥٠% من الموضوع اللي تقرأه .. يعني ما يكون سهل بنسبة ١٠٠% تفهم كل شيء ولا صعب بنسبة ١٠٠% ما تفهم ولا شيء. وعشان تقييم الكتاب أو المستوى، اقرأ أول صفحتين منه وشوف كيف الأمور.. إذا فهمت الموضوع بشكل عام بنسبة ٥٠ – ٦٠% معناه انك بالمستوى المناسب.. لكن إذا ما فهمت ولا شيء شوف المستوى الأقل، والعكس.. إذا شفت انه كل الكلمات واضحة والموضوع كأنك تقرأه بالعربي خلاص بتروح لمستوى أعلى.

💻 مصدر أونلاين:

انصحك تقرأ من مصادر مجانية زي  موقع Story-Nory

هذا الموقع كمان ممتاز لتطوير مهارة القراءة هو عبارة قصص مجمعة وبلغة مناسبة للمتعلمين من حيث التدرج ومن حيث اللغة المناسبة للتعلم..

وراح تسوي نفس الشي اللي تكلمت عنه في القراءة الورقية عشان تحدد المستوى المناسب ليك. وترا ما يحتاج العالم يسمع انت ايش قاعد تقرأ، القراءة الصامتة في مرحلة التعلم أفضل لأنها راح تدربك على تركيز أقوى وقراءة أسرع. ابدأ من اليوم في تطوير قراءتك واستخدم المصدر الأنسب ليك وأوعدك تلاحظ تطور قوى.

وبعد ما اخترت المستوى المناسب ليك وبديت فعليا في القراءة والتطوير ايش هي طريقة القراءة نفسها اللي تفيدك وتطور لغتك من جد؟

هي انك لا تركز على حفظ  كل كلمة جديدة تقابلك! حفظ كل الكلمات معناه نسيان سريع وتطور بطيء.. خلي كل تركيزك على فهم الموضوع بشكل عام وعن ايش يتكلم،  وترجم بس الكلمات الجديدة اللي ما يمديك تخمنها أو تفهم الصورة الأساسية بدونها،  أو اللي تتكرر كثير عشان تساعدك لفهم أفضل. ترجم وكمل لا توقف تحفظ وتكتب وتسمع وترجع تعيد ووو.. مرة ضاع وقتك والفائدة اللي تعود عليك مهي بهذيك القوة.

ودحين خلصنا كيفية تطوير قسم القراء وباقي انك تبدأ في التطوير .. خلينا نعرف كيفية تطوير مهارة الكتابة في المقال الجاي

إذا استفدت شارك هذا المقال 💛 

وإذا عندك اي سؤال ارسلي في تويتر من هنا