قسم الإستماع من أسهل أقسام اختبار الايلتس.. لكن عشان تتمكن منه وتوصل لأكبر عدد من الإجابات الصحيحة وتحصل درجة عالية ما ينفع تحل بشكل عشوائي لازم تكون مخطط للحل وجاهز بالتكنيكات وطرق الحل اللازمة للوصول للإجابات الصحيحة بأسرع وقت وأدق الحلول.

واول شيء لازم تسوي له حساب وتكون مستعد له هو في الاختبار هو التركيز.. معظمنا مع رهبة الاختبار والتوتر يضيع تركيزه وهذا أخطر شيء ممكن يقابلك باختبار الايلتس بشكل عام انه تفقد تركيزك.

⚙️ التكنيكات الأساسية

هذي التكنيكات راح تساعدك تبدع في اختبار الإستماع بشكل عام ويكون تركيزك الضعف عشان تجيب اكثر عدد من الاجابات صح .

التكنيكة 1️⃣

 في بداية كل قسم عندك ٣٠  ثانية لقراءة الأسئلة.. هذا الوقت في ذاته هو هدية ليك ولازم تستفيد منه قد ما تقدر.. كيف؟ 

• أولا: كون فكرة عامة عن كل قسم من خلال قراءة عنوان القسم وخمن الموضوع حيكون عن ايش.. 
• ثانياً: خذ نظرة سريعة على الأسئلة وحدد الكلمات الدلالية في كل سؤال. 

التكنيكة 2️⃣

حط خط تحت اخر سؤال راح تسمعه عشان تكون مركز وما تروح على باقي الأسئلة اللي ما راح تسمعها.. هذي الطريقة حتساعدك تركز أكثر مع الشريط.. وكمان إذا فاتك سؤال يمديك تلحق على الشريط.

التكنيكة 3️⃣

إذا اختبارك ورقي ما تجلس تكتب الكلمة كاملة.. اكتب الكلمة بسرعة بخطك السري وفي النهاية حيكون عندك ١٠ دقايق لنقل الاجوبة.. ركز خلالها انه تكتب الجملة بالسبلنغ الصح.

التكنيكة 4️⃣

إذا فاتك سؤال لا تضيع وقت في محاولة  تذكر الإجابة اكتب اي تخمين أو علامة استفهام عند السؤال وكمل السؤال اللي بعده .. لأنه إذا حقدت على السؤال ووقفت عنده كثير مو بس حتفقد هذا السؤال لكن احتمال كبير تفقد أسئلة بعده كمان.

التكنيكة 5️⃣

أثناء الإستماع ركز على الجمل الإنتقالية اللي توضح لك انه انتقل للنقطة اللي بعدها أو بدأ فكرة جديدة زي:

• Can I start by.
• Now can I…
• And, can I… 
• And one more question.
• Moving on now to our second…
• Now, let me tell you about…

هذي الطريقة حتساعدك تكون مركز أكثر وقادر تميز الانتقال بين الأسئلة وبالتالي تكون ماشي مع الترتيب الصحيح للأجوبة.

التكنيكة 6️⃣

نفس الشيء بالنسبة لجمل تغيير الرأي.. في كثير من الأحيان في القسم الأول راح تسمع الإجابة وبعدين يقوم المتحدث بتغيير رأيه.. وفي بعض الجمل اللي تساعدك تعرف انه غير رأيه مهم تركز معاها:

• Oh, wait a minute.
• Oh, no..
• In fact it’s.
• But actually.
• Sorry X, not. 

التكنيكة 7️⃣

السبلنج السبلنج! شبح الايلتس بشكل عام وشبح الإستماع بشكل خاص.. لأنه بقسم الاستماع إذا كلمة كتبتها بحرف واحد غلط = إجابة غلط.. عشان أكون صريح معاك كلنا نعاني من مشكلة السبلنغ لانه ما تعودنا انه نكتب اصلا ونعتمد بشكل كبير على المصحح الآلي في الجوال.. والحل في هذي الأربع خطوات:

1.  ركز على الإملاء: وانت تكتب لا تعتمد على المصحح الآلي.
2. تقسيم الكلمة: قسم الكلمة إلى مقاطع.. مثلا de-part-ment
3. اكتب يوميا: كثرة التدرب راح تحل أزمتك مع قسم الكتابة 
4. أداة تطوير السبلنغ: حتساعدك تتعلم بشكل عملية كتابة الكلمة صح

طبعا ما يحتاج أقولك انه تعلمك للتكنيكات وطرق الحل أو تعلمك لها بشكل نظري مو هو الشيء اللي راح يطور مستواك ويضمن لك أعلى درجة لكن تدربك والحل بنفسك هو أقصر طرق تفوقك بقسم الإستماع. ويمديك تدرب على الاختبارات التجريبية من هذا الموقع

يلا دحين أشوفك في المقال الجاي نعرف فيه كلمات قسم الاستماع في اختبار الايلتس

إذا استفدت شارك هذا المقال 💛 

وإذا عندك اي سؤال ارسلي في تويتر من هنا